ସାରସ୍ୱତ TANKA/ତାଂକା କାବ୍ୟ ଯାତ୍ରା - ୮
୧)
ଗାଆଁ ସୂରୁଜ
ନୁହେଁ ସହର ପରି
ଉଠେ ସଅଳ
ହଳ ବଳଦ ସଙ୍ଗେ
କ୍ଷେତ ଚାଲେ କୃଷକ ।
~ ପ୍ରଦୀପ କୁମାର ଦାଶ
୨)
ବରଷା ରାଣୀ
ଆସ ଆସ ଧରଣୀ
ବେଳ ହେଲାଣି
ଚଷା ଡାକ ଦେଲେଣି
କ୍ଷେତ ବାସି ଗଲାଣି ।
୩)
ଚଷାର ଆଶା
ଝିପି ଝିପି ବରଷା
ଫସଲ ହସା
କୃଷକ ବିଲ ବଣେ
ତେବେ ବାନ୍ଧିବ ବସା ।
~ ମୁକ୍ତେଶ୍ଵର ପଧାନ
୪)
ଗୋଟେଇବାକୁ
ତୁମର ପାଦଚିହ୍ନ
ସିକ୍ତ ବାଲିରେ
ବଳ ବି ନାହିଁ ଆଉ
ଅପରାହ୍ଣ ବୟସେ ।
~ ରାଜେଶ କୁମାର ମୁଣ୍ଡ
୫)
ଚଳ ଚଞ୍ଚଳ
ମନୋରମ ପ୍ରଭାତ
ଉଠି ସଅଳ
ଦିଅନ୍ତି ଅର୍ଘ୍ୟ ଢ଼ାଳି
ଶ୍ରମ'ର ଦୀପ ଜାଳି
୬)
ଗାଁର ଲଳନା
ଲାଜ ଗହଣା ପିନ୍ଧି
ନାହିଁ ଛଳନା
ଦିଅଇ ସ୍ନେହ ବାଣ୍ଟି
ବାନ୍ଧଇ ପ୍ରେମ ଗଣ୍ଠି ।
~ ପ୍ରତିମା ମେହେର
୭)
ଏନ୍ତୁଡ଼ି ନିଆଁ
କୁଆଁ କୁଆଁ ରାବ ରେ
ଘରଟି ଫାଟେ
ଜୀବନ ର ସାୟାହ୍ନେ
ଉଠେ ଜଳନ୍ତା ଜୁଇ ।
~ ବାସନ୍ତୀ ଦେଈ
୮)
ପ୍ରେମର ବହ୍ନି
ଦଗ୍ଧିଭୂତ ଅନ୍ତର
ବିରହ ସ୍ୱର
ସ୍ୱପ୍ନଟି ହଜିଯାଏ
ଅସରନ୍ତି ରଜନୀ ।
୯)
ହୃଦୟ ଖୋଜେ
ଶୀତଳ ସ୍ନେହସ୍ପର୍ଶ
ନିଷ୍ଫଳ ଚେଷ୍ଟା
ଅଶ୍ରୁଭିଜା ନୟନ
ଅନ୍ତଦାହର ଗାଥା ।
~ ମନୀଷା ମିଶ୍ର
୧୦)
ବାଲୁକା ଘର
ଅସୁମାରୀ ସପନ
ଧୂଳିସାତ୍ ହୁଏ
ବାସହୀନ ପଳାଶ
ଅବେଳା ଝରିଯାଏ ।
୧୧)
ଝରା ଶେଫାଳି
ବସନ୍ତର ମୃଦୁସ୍ପର୍ଶ
ମନ୍ଦ ସମୀର
ଘାସର ଗାଲିଚାରେ
ଫଗୁଣର ସମ୍ଭାର ।
~ ରମାକାନ୍ତ ସତପଥି
୧୨)
ପୁରୀ ଶ୍ରୀକ୍ଷେତ୍ର
କି ସୁନ୍ଦର ଆହା ସେ
ପ୍ରଭୁଙ୍କ କ୍ଷେତ୍ର
ଜଗା ବଳିଆ ହାତ
ଦେଉଳେ ଉଡେ ନେତ ।
~ ଡମ୍ବରୁଧର ବାଗ
୧୩)
ବାଳାରୁଣର
ପ୍ରବେଶେ ହସେ ଧରା
ହସେ ଦୁନିଆ
ଅନ୍ଧାର ହଟିବ ତ
ଆଲୁଅର ପ୍ରକାଶେ ?
~ ରାଜେଶ କୁମାର ମୁଣ୍ଡ
୧୪)
ମଧୁ ଭାଷିଣୀ
ବିରହ କାତରତା
ପ୍ରେମ ପ୍ରତିମା
ପରମ ଵୁଦ୍ଧିମତା
ଶ୍ରୀକୃଷ୍ଣ ଚିତ୍ତହରା ।
~ ଦେବେନ୍ଦ୍ର ନାରାୟଣ ଦାସ
୧୫)
ତାଜା ରକ୍ତରେ
ମାଟି ରଙ୍ଗେଇ ଦେଇ
ସୀମାରେଖାରେ
ପତାକା ଘୋଡିହୋଇ
ଶୋଇଯାଏ ସହିଦ ।
୧୬)
ଧନୀ ଗରିବ
ରକ୍ତର ରଙ୍ଗ ଲାଲ
ତେବେ କାହିଁକି..?
ଦଲକାଏ ପବନ
ଲବଣାକ୍ତ ଲୁହରେ ।
୧୭)
ପ୍ରତିଶୋଧ ର
ନିଆଁରେ ଜଳିଯାଏ
ଜୀବନଟିଏ
ମାନବିକତା ହଜେ
ନାରୀ ମାଂସ ଲୋଭରେ ।
୧୮)
ଭିକ୍ଷାର ଥାଳ
ନିଜର ପରିଚୟ
ପ୍ରକୃତ ଧର୍ମ
ଗରିବ ତଣ୍ଟିଚିପି
ତୋଳାହୁଏ ମନ୍ଦିର ।
୧୯)
ଲୋଭରୁ ମୃତ୍ୟୁ
ପାପ ଅର୍ଜିତ ଧନ
ବୁଝେନିମନ
ପାଇବାର ଆଶାରେ
ଖସିଯାଏ ତଳକୁ ।
~ ସମିତା ସ୍ବାଇଁ
୨୦)
ନିଜର ଦୁଃଖ
ତୃଣ ପରି ଜାଣିବ
ମିତ୍ରର ଦୁଃଖ
ମେରୁ ସମ ଗଣିବ
ଏହା ନାମ ବନ୍ଧୁତା ।
୨୧)
ଗାଁଆ ଛାଡି କି
ସହରକୁ ଯାଉଛ
ଗାଁଆର ଲୋକେ
କାନ ଡେରିକି ଶୁଣ
ଦିନେ ଗାଁଆ ଫେରିବ ।
୨୨)
ଯୁଗ ବିତିଲା
ଅନ୍ଧାର ଓ ଆଲୁଅ
ଲଢୁ ଅଛନ୍ତି
କେହି ବି ଜିତିଲେ ନି
କେବେ ହେବ ସକାଳ ।
~ ଶ୍ରୀରାମ ସାହୁ
☆☆☆☆☆☆☆☆☆☆
कोई टिप्पणी नहीं:
एक टिप्पणी भेजें