ସାରସ୍ୱତ TANKA/ତାଂକା କାବ୍ୟ ଯାତ୍ରା - ୫
୧)
ଜଣା ଅଜଣା
ଜୀବନ ଅସମ୍ପୂର୍ଣ୍ଣ
ଶୂନ୍ୟ ଠିକଣା
କେବେ ସେ ସୁଖ ନଈ
ହେଲେ କେବେ ଯନ୍ତ୍ରଣା ।
~ ପ୍ରଦୀପ କୁମାର ଦାଶ
୨)
ବିଦ୍ରୋହ ନିଆଁ
ଜଳୁଛି, ଜଳୁଥାଉ
କିଏ ପଚାରେ
ମରୁଥାଆନ୍ତୁ ଲୋକେ
କାହାର କ'ଣ ଯିବ ?
~ ରାଜେଶ କୁମାର ମୁଣ୍ଡ
୩)
ଦୁଃଖର ନଈ
ବହେ ସମୟ ଧାରେ
ସାଗରେ ଯାଇ
ବକ୍ଷେ ମିଶିବା ପରେ
ଲୀନ ପ୍ରିୟ'ର କୋଳେ ।
~ ପ୍ରତିମା ମେହେର
୪)
ଅଶରୀରୀ ର
ହାତ ଗୋଡ଼ ନାହିଁ ତା
ଦେଖାଏ କାୟା
ନିର୍ଜନ ରାତିଟାରେ
ଭୟଭୀତ ମଣିଷ ।
୫)
ପ୍ରଭୁ ଙ୍କ ନାମ
ଡାକୁଥିଲେ ଅନ୍ତରେ
ମନରେ ଦମ୍ଭ
ଭୂତ ପିଶାଚ ଭୟ
ଡରିବ ନାହିଁ ଲବେ ।
~ ବାସନ୍ତୀ ଦେଈ
୬)
ଭାରତ ବନ୍ଦ
ସରକାର ନୀରବ
ବିଦ୍ରୋହ ବହ୍ନି
ରାସ୍ତାଘାଟ ଶୂନ୍'ଶାନ୍
ଦୋକାନ ବଜାର ବନ୍ଦ୍ ।
୭)
ପୋଲିସ୍ ସାଇରନ୍
ରାଜରାସ୍ତାରେ ନିଆଁ
ଧୂମ୍ର କୁହୁଡ଼ି
ନିର୍ଦୟ ଲାଠି ପ୍ରହାର୍
ମୁର୍ଦ୍ଦାବାଦର ଧ୍ୱନି ।
~ ରମାକାନ୍ତ ସତପଥି
୮)
ଯାହା କାନ୍ଧରେ
କାଲି ଯିବାର ଥିଲା
ଶେଷ ଯାତ୍ରାରେ
ନିଷ୍ଠୁର ମହାମାରୀ
ତୋଳିଛି ମୋ କାନ୍ଧରେ ।
~ ରଞ୍ଜନ ଜେନା
୯)
ଦାଦନ ଖଟେ
ଉଦର କ୍ଷୁଧା ଜ୍ୱାଳା
ପ୍ରବାସୀ ସାଜେ
ସ୍ତ୍ରୀର ଶବ କାନ୍ଧରେ
ସନ୍ତାନ ବିକ୍ରି କରେ ।
୧୦)
ପ୍ରବାସ କ୍ଷେତ୍ରେ
ଇଟାଭାଟିରେ ବନ୍ଧା
ଜୀବନ ଗାଥା
ଜୀବିକା ଭୂଲୁଣ୍ଠିତ
ଚାବୁକର ପ୍ରହାର ।
~ ମନୀଷା ମିଶ୍ର
୧୧)
ବିଶ୍ବାସ ଆଜି
ବିଷ ର ବଳୟରେ
ବିଳାପ କରେ
ଅବସନ୍ନ ଶରୀର
ବିଷାଦଗ୍ରସ୍ତ ମନରେ ।
୧୨)
ଶୂନ୍ୟ ପୃଷ୍ଠାରେ
ନିତି ନୂଆ କାହାଣୀ
ସ୍ବାର୍ଥକୁ ନେଇ
ଅସି ଆଉ ମସୀରେ
ଜବରଦସ୍ତ ସଂଗ୍ରାମ ।
୧୩)
ଭୋକିଲା ପେଟ
କେତେ ଯେ କୋହମୟ
ଅବ୍ଯକ୍ତ ବ୍ଯଥା
ଆଷାଢ ମେଘପରି
ଦୁଇଟୋପା ଲୁହରେ ।
୧୪)
କାଗଜ ଡଙ୍ଗା
ଭାସୁଛି ଓଳିତଳେ
ବର୍ଷା ପାଣିରେ
ରାଜଧାନୀ ରାସ୍ତାରେ
ଭଡାଟିଆ ମନରେ ।
୧୫)
ଭୋକର ଦାଉ
ନିଆଁ ଜଳେ ପେଟରେ
ଶୁଖିଲା ମୁହଁ
ଅସହାୟ ଅବସ୍ଥା
ବାଟବଣା ବ୍ଯବସ୍ଥା ।
~ ସମିତା ସ୍ବାଇଁ
୧୬)
ରାତି ଆସିଲେ
ଦିନଟେ ମରିଯାଏ
ସ୍ମୃତି ସରେନି
କ୍ଷତ ପୁଣି ଓହ୍ଲାଏ
ସୂର୍ଯ୍ୟର ଜାମା ପିନ୍ଧି ।
୧୭)
ୠତୁ ବଦଳେ
ଗଛ ଯେମିତି ପିନ୍ଧେ
ହଳେ ପୋଷାକ
ପଳାସ ଆଣେ ତାତି
ଗେଣ୍ଡୁ ଥରାଏ ଛାତି ।
~ ଲିଙ୍ଗରାଜ ପାତ୍ର
୧୮)
ମହୁରୀ ସ୍ୱର
ବଢ଼ାଏ ଉଦ୍ଦୀପନା
ଉଛୁଳେ ବେଦୀ
ଯୋଡଇ ଦୁଇପ୍ରାଣ
ଶୁଖାଇ ଭରା ନଦୀ ।
~ ରଞ୍ଜନ ଜେନା
☆☆☆☆☆☆☆☆☆☆
कोई टिप्पणी नहीं:
एक टिप्पणी भेजें