ସାରସ୍ୱତ ହାଇକୁ କାବ୍ୟ ଯାତ୍ରା
~ ହାଇକୁ PROMPT ~
"ଲୁହ"
~•~
୧)
ମନର କୋହ
ଲୁଚେଇ ଦିଏ ଲୁହ
ଦେଖାଏ ହସ ।
୨)
କାନ୍ଦୁଛି ହସ
କରଇ ଉପହାସ
ଅଶ୍ରୁର ସୂଅ ।
୩)
ଲୁହର ନଈ
ଆଖିଟା ଅମାନିଆ
ଚାଲିଛି ବହି ।
୪)
ଲୁହର କଥା
ଆଖିର ଆଇନାରେ
ସାଜିଛି ବ୍ୟଥା ।
୫)
ମନର କୋହ
ତୁମକୁ ଡାକ ଦିଏ
ଆଖିର ଲୁହ ।
~ ପ୍ରଦୀପ କୁମାର ଦାଶ
୬)
ଅସରା ଲୁହ
ଝର ଝର ଝରଇ
ଛୁଟଇ ସୁଅ ।
୭)
କହଇ କଥା
ମୋତି ଝରା ଲୁହରେ
ନୁଆଁଇ ମଥା ।
୮)
ଅଶ୍ରୁଳ ଆଖି
ଚିବୁକେ ବହିଆସି
ବ୍ୟଥାକୁ ଚାପି ।
୯)
ଦେଖତ ଲୁହୁ
ଥିପୁଛେ ଥପ ଥପ
ଶୁଖିଛେ ମୁହୁଁ ।
୧୦)
ନି ବୁହା ଲହ
ରାଧା ନନୀ ସୁନ୍ଦରୀ
ବିରହ ସହ ।
୧୧)
ଚକ ଚକେଇ
ଯଉଛେ ଆଖି ଲହ
ମତି ବାଗିର ।
~ ପ୍ରତିମା ମେହେର
୧୨)
ଲୁହ ର ଭାଷା
ହୃଦ କନ୍ଦରରୁ ସେ
ମନ ର ଆଶା ।
୧୩)
ଝରିଲା ଲୁହ
ସମାଜ ଦେଖେ ସିନା
ବୁଝେନା କୋହ ।
୧୪)
ଲହୁ ଓ ଲୁହ
ଫରକ ନ ଥାଏ ଯେ
ଜାଣିଲେ କହ ।
~ ଆଶୁତୋଷ ମେହେର
୧୫)
ଟୋପାଏ ଲୁହ
କାହାକୁ ଉପକାର
କାହାକୁ କୋହ ।
୧୬)
ଢ଼ାଳିବା ଲୁହ
ମାଟି ମାଁ ପାଇଁ ଆମେ
ପାଇବା ସ୍ନେହ ।
୧୭)
ଲୁହ ମଙ୍ଗଳ
ଖୁସିରେ ଝରେ ମଧ୍ୟ
କରେ କୁଶଳ ।
୧୮)
ଝିଅ ବିବାହ
କରି ବାପା ମାଆଙ୍କ
ଝରଇ ଲୁହ ।
୧୯)
ନାତି ନାତୁଣୀ
ପାଇ ଖୁସିରେ ଲୁହ
ଝରାନ୍ତି ପୁଣି ।
୨୦)
ଲୁହର ରୂପ
କେତେ ଗଭୀର କିଏ
କରିଛି ମାପ ।
~ ମୁକ୍ତେଶ୍ଵର ପଧାନ
୨୧)
ଆଖିର ଲୁହ
ଛାତି ର କୋହ ମିଶି
ଚିତ୍କାର କରେ ।
୨୨)
ଗା'ରେ କଜ୍ଜଳ
ଦୁଇ ଧାର ଲୁହରେ
ଚିବୁକ ଛୁଏଁ ।
୨୩)
ଲୁହର ନଈ
ପହଁରି ବାକୁ ହୁଏ
ଦୁଃଖ ସାଗରେ ।
୨୪)
ଲୁହ ଟୋପାଏ
ଝରି ଯାଏ ଖୁସିରେ
ଦୁଇ ଆଖିରୁ ।
୨୫)
ଲୁହ ପଖଳା
ଭିଜା ଭିଜା ଅନ୍ତର
ଭାରୀ ଗଭୀର ।
୨୬)
ନୟନେ ଲୁହ
ସ୍ବପ୍ନମୟ ଭାବନା
ଉଜ୍ବଳ ଚିତ୍ର ।
୨୭)
ନୀରବ ଲୁହ
ହୃଦୟ ସ୍ପନ୍ଦନରେ
ନିଥର ଆଜି ।
୨୮)
ଲୁହ ଲହୁରେ
ଅନୁରାଗରେ ଲେଖା
ପ୍ରେମ କବିତା ।
୨୯)
ଅଭିମାନିନୀ
ଅମାନିଆ ଲୁହରେ
ସିକ୍ତ ହୃଦୟ ।
୩୦)
ଦୁଃଖ ସୁଖର
ସାକ୍ଷୀ ଲୁହର ଧାର
ଅତି ନିଜର ।
୩୧)
ଲୁହ ସହିତ
ସଂପର୍କ ନିବିଡତା
ଭାବ ଗମ୍ଭୀର ।
୩୨)
ଲୁହକୁ ଢାଳି
ପ୍ରାର୍ଥନା କର ନିତି
ପ୍ରଭୁ ପୟରେ ।
୩୩)
କୁଆଁରୀ ଲୁହ
ଭିଜା ଭିଜା ସପନ
ନୟନ କୋଣେ ।
୩୪)
ଲୁହ ଓଜନ
ଲୁହା ଠାରୁ ବି ବେଶୀ
ସାରା ଜୀବନ ।
୩୫)
ଲୁହ ନିଆଁ ରେ
ପାଷାଣ ହୃଦୟଟା
ତରଳି ଯାଏ ।
୩୬)
ଦିଟୋପା ଲୁହ
ଦୁଃଖ କୁ ଧୋଇନିଏ
ଅନୁରାଗରେ ।
୩୭)
ଲୁହର ଧାର
ଲାଗେ ଭାରି ଉଷୁମ
ମୁକୁତା ସମ ।
୩୮)
ଆଖି ଲୁହରେ
ଭିଜେ ପଣତ ନିତି
ସମୟ ସ୍ରୋତେ ।
୩୯)
ଲୁହ ଝରିଲେ
ଓଠବି ହସୁଥାଏ
ତ୍ଯାଗ ପ୍ରେମରେ ।
୪୦)
ଲେଖୁଛି ଆଜି
ଲୁହର ଇସ୍ତାହାର
ହୃଦୟେ ମୋର ।
୪୧)
ଲୁହ ବରଫ
ଜମାଟ ବନ୍ଧା କୋହ
ନିଭୃତ କୋଣେ ।
୪୨)
ଲୁହର ଝଡ
ମାନେନି ବନ୍ଧବାଡ
ନଥାଏ ସୀମା ।
୪୩)
ଲୁହରେ ଲେଖା
ଶେଷ କାହାଣୀ ଏକ
ଦେଶ ପ୍ରେମର ।
୪୪)
ଆଖି କୋଣରୁ
ଲୁହ ଝରଣା ହୋଇ
ଯାଏ ସେ ବୋହି ।
୪୫)
ଲୁହଟା ଯେବେ
ଦୁଃଖ ସାଗର ହୁଏ
ଜୀବନ ଭାସେ ।
୪୬)
ବିଦାୟୀ ବେଳେ
କନ୍ଯା ଆଖିର ଲୁହ
ହୃଦୟ ଦହେ ।
୪୭)
ଲୁହର ବନ୍ଯା
ଭୁଲ୍,ଠିକ୍ ହିସାବ
ଚକ୍ରବ୍ଯୁହରେ ।
୪୮)
ଜୀବନ ବିତେ
ବୁଢୀଆଣି ଜାଲରେ
ଲୁହରେ ଛନ୍ଦା ।
୪୯)
ଅବ୍ଯକ୍ତ କୋହ
ବିଳାପ କରେ ଦୁଃଖ
ଅସରା ଲୁହ ।
୫୦)
ଲୁହ ବଦଳେ
ଯେବେ ଝରଇ ଲହୁ
ଅନେକ ବ୍ଯଥା ।
୫୧)
ଅଶ୍ରୁ ଜଳରେ
କରୁଛି ନିରାଜନା
ଦୁଃଖ ସଂସାରେ ।
୫୨)
ଲୁହ ବତୁରା
ବାତ୍ସଲ୍ୟ ଭାବଭରା
ପ୍ରେମ ପସରା ।
୫୩)
ଲୁହ ଝରାଏ
କୁମୁଦିନୀ ଦୁଃଖରେ
ସରସୀ ନୀରେ ।
~ ସମିତା ସ୍ୱାଇଁ
୫୪)
ଲୁହର ଦାଗ
ବର୍ଷାକୁ ଭଲ ପାଏ
ଜଣା ପଡ଼େନି ।
୫୫)
ଲୁହ ଓ ଲହୁ
ଜୀବନ ସଂଗ୍ରାମରେ
ଅଭ୍ୟସ୍ତ ଏବେ ।
~ ରାଜେଶ କୁମାର ମୁଣ୍ଡ
୫୬)
ଦି ଟୋପା ଲୁହ
ଝରିନି ଯେବେ ତୁମ
ସିଏ କି ମୋହ ?
୫୭)
ଆଖିରୁ ଝରେ
ହୃଦୟ ବୋଝ ଯେତେ
ହାଲକା କରେ ।
~ ସୁଧୀର କୁମାର ପଣ୍ଡା
୫୮)
ଆଖିର ଲୁହ
ସୁଖ ଦୁଃଖ ତ କେବେ
ତତଲା କୋହ !
୫୯)
ଲୁହର ଭାଷା
ପଢ଼ିପାରନ୍ତି ବିଜ୍ଞେ
ହୃଦର ଆଶା ।
୬୦)
ଆନନ୍ଦ ଅଶ୍ରୁ
ପରିଜନ ମସ୍ତକେ
ଆଶିଷ ବର୍ଷୁ !
~ ଶମ୍ଭୁନାଥ ଦାସ
୬୧)
ଲୁହ ମୋହର
ବହୁଛି ଅବିରତ
ସ୍ମୃତିରେ ତୋର ।
୬୨)
ମାଆର ଲୁହ
ପୋଛି ଦେବାପାଇଁ ତ
ଜନମ ମୋର ।
୬୩)
ଦୁଃଖି ଜୀବନ
ଲୁହ ଭିଜା ବଦନ
କଟେ ଜୀବନ ।
୬୪)
ଲୁହର ଧାର
ଶୁଖିଯାଏ ଆପଣା
ହେଲେ ଟି ପର ।
୬୫)
ଲୁହ ନ ବୋହି
ସଦା କାନ୍ଦଇ ଯିଏ
ଦୁଃଖ ସହଇ ।
~ ଜୟରାମ ସାହୁ
୬୬)
ପାହାଡି କନ୍ୟା
ନିତି ଝରାଏ ଲୁହ
ଦେଖି ତା ସ୍ଥିତି ।
୬୭)
ଜଙ୍ଗଲ ନିଆଁ
ବନ୍ୟଜନ୍ତୁ ଚିତ୍କାର
ଲୁହର ବନ୍ୟା ।
~ ଡମ୍ବରୁଧର ବାଗ
୬୮)
ଲୁହ ବୁହାଇ
ଲାଘବ କରିଥାଏ
ହୃଦ ବେଦନା ।
୬୯)
କୁଆଁରୀ କନ୍ୟା
ଯୌବନେ ପ୍ରତାରଣା
ଲୁହର ବନ୍ୟା ।
୭୦)
ଦୁଃଖୀ ମଣିଷ
ବଞ୍ଚିବା ଆଶା କ୍ଷୀଣ
ଲୁହ ସମ୍ବଳ ।
୭୧)
ବୀର ଶହୀଦ
ଅର୍ଦ୍ଧାଙ୍ଗିନୀ ଲୋଚନ
ପ୍ଲାବିତ ଅଶ୍ରୁ ।
୭୨)
ବୀର ପ୍ରସବା
ଜନନୀ ଜନ୍ମଭୂମି
ଲୋତକ ଭରା ।
୭୩)
ଲୁହ କୁ ପୋଛ
ଅକାରଣେ ନ ବୁହା
ଦାମିକା ଚିଜ ।
୭୪)
ମା ଆଖି ଲୁହ
ବୁଝି ଯିଏ ପାରିବ
ପ୍ରକୃତ ପୁଅ ।
୭୫)
ସନ୍ତାନ ଲୁହ
ଦେଖିଲେ ମାଆ ତାର
ବୁକୁରେ କୋହ ।
~ ବାସନ୍ତୀ ଦେଈ ଖୋର୍ଦ୍ଧା
୭୬)
ଶିଳ୍ପୀର ମୃତ୍ୟୁ
ଆଉ କିଛି ଲୋଡ଼ାନି
ଦି'ଟୋପା ଲୁହ ।
~ ପ୍ରଫୁଲ୍ଲ ଚନ୍ଦ୍ର ପାଢ଼ୀ
୭୭)
ଆଖିର ଲୁହ
ଦୁଃଖ ବେଦନା ଅବା
ଖୁସିର ସୁଅ ।
୭୮)
ଚକ୍ଷୁ ର ଜଳ
ସୁଖ ଦୁଃଖର ଧାରା
ଅତି ନିର୍ମଳ ।
~ ଦୟାନନ୍ଦ ଶବର
୭୯)
ଟୋପାଏ ଲୁହ
କହିଦେଇ ପାରିବ
ମନର କୋହ ।
୮୦)
ଲୁହ ଝରେଇ
ଦୁଃଖ କଷ୍ଟ କହୁଛି
ବ୍ୟାକୁଳ ହୋଇ ।
~ ସନ୍ତୋଷ କୁମାର ସାହୁ
୮୧)
ଦି ଟୋପା ଲୁହ
ଛାତିରେ କୋହ ଭରା
ବ୍ୟଥା ବେଦନା ।
୮୨)
ମାଆର ଲୁହ
ସନ୍ତାନ ପାଇଁ ଝରେ
ଜୀବନ ସାରା ।
୮୩)
ବୀରା ରମଣୀ
ଲୋତକରେ ପ୍ଲାବିତ
ଧରଣୀ ରାଣୀ ।
୮୪)
ଲହୁ ଲୁହରେ
ଲେଖୁଛି ଶେଷ ଇଚ୍ଛା
ଏଇ ଚିଠିରେ ।
୮୫)
କୃଷକ ଭାଇ
ଲହୁ ଲୁହ ମିଶାଇ
ଖାଦ୍ୟ ଯୋଗାଏ ।
୮୬)
ରୂପସୀ କନ୍ୟା
ତୋ ପାଇଁ ଝରୁଛି ମୋ
ଲୁହର ବନ୍ୟା ।
୮୭)
ବାଡୁଅ କନ୍ୟା
ବାହାଘରେ ଝରାଏ
ଲୁହର ବନ୍ୟା ।
୮୮)
ଝିଅ ଜନମ
ଲୁହର ସୁଅ ଛୁଟେ
ସାରା ଜନମ ।
୮୯)
ଦୁଃଖୀ ଲୋକଟି
ନିରାଶ୍ରୟେ ଲୋତକ
ଝରାଏ ନିତି ।
୯୦)
ସନ୍ତାନ ଦୁଃଖେ
ମାଆ ଆଖିରୁ ଝରେ
ଲୁହ ଅନେକ ।
୯୧)
ମନକୁ ମାରି
ଲୁହ ଝରାଉଛି ମୋ
ରାଜକୁମାରୀ ।
୯୨)
ଅବ୍ୟକ୍ତ କୋହ
ଖୁସିରେ ଝରି ଯାଏ
ଦି ଟୋପା ଲୁହ ।
୯୩)
ଜଗତନାଥ
ନୟନେ ଦେଲ ଲୁହ
ଜୀବନ ଯାକ ।
୯୪)
ଲୁହର ନଈ
ହୃଦୟରୁ ପ୍ରିୟାଲୋ
ଯାଉଛି ବହି ।
୯୫)
ପ୍ରଥମ ଚିଠି
ଲୁହରେ ଲେଖେ ଭିଜି
ଅଭୁଲା ପ୍ରୀତି ।
୯୬)
କଇଁର ଲୁହ
ପ୍ରୀତିର ସରାଗରେ
ଖୋଜେ ଚନ୍ଦ୍ରମା ।
୯୭)
ଝିଅ ବିଦାରେ
ଲୁହ ଭିଜିଯାଏ ସେ
ପଣତକାନି ।
୯୮)
ବିରହ ସୂରେ
କାହ୍ନୁ ବିଚ୍ଛେଦେ ରାଇ
ଲୋତକ ଝରେ ।
୯୯)
ଭଗ୍ନ କୋଣାର୍କ
ବାରଶହ ବଢେଇ
ଲୁହରେ ଗଢା ।
୧୦୦)
ଅଶୋକ ବନେ
ଲୁହ ଝରାନ୍ତି ସୀତା
ବିରହି ସୂରେ ।
~ ଦମୟନ୍ତୀ ରଥ
୧୦୧)
ଜଟିଳ ଲୁହ
ଦୁଃଖ ସାଥିରେ ଥାଏ
ଆନନ୍ଦେ ଝରେ ।
୧୦୨)
ଲୁହ ଔଷଧ
ହୃଦ ହାଲୁକା କରେ
ନଝରି ମାରେ ।
୧୦୩)
ଲୁହ ମୁକୁତା
ଆବେଗ ଗଲେ ବଢ଼ି
ପଡଇ ଝରି ।
୧୦୪)
ଲୁହ ଠିକଣା
ହୃଦୟ ଜାଣି ଥାଏ
ଦରଦୀ ବୁଝେ ।
~ ରଞ୍ଜନ ଜେନା
୧୦୫)
ବୁହବା କେନ୍ତା
ଜମି ଯାଇଚେ ଆଁଖୀ
ଅନ୍ତ୍ରର ଦୁଃଖ ।
~ ଉପେନ୍ଦ୍ର ପ୍ରସାଦ ମେହେର
୧୦୬)
ଆଁଖିର ଲୁହ
ଦେଖଲେ ଅହରହ
ହେସି ଅସହ ।
~ ଦେବାର୍ଚ୍ଚନ ନାଏକ
୧୦୭)
ଆଖି ର ଲୁହ
କହିଦେଇ ପାରେ ସେ
ମନ ର କୋହ ।
୧୦୮)
ଖୁସି ର ଲୁହ
ଝରେ ମାତା ନୟନୁ
ବିଜେତା ପୁତ୍ର ।
~ ରତ୍ନ ପ୍ରଭା ସିଂ
୧୦୯)
ଶ୍ରାବଣୀ କନ୍ୟା
ନୀଳ ନୟନେ ତାର
ଲୁହର ବନ୍ୟା ।
୧୧୦)
ଲୁହ ଠିକଣା
ନଜାଣି ପାରି ହୁଏ
ମୁଁ ବାଟବଣା ।
୧୧୧)
ଲୁହ ତ ସାଥୀ
ମରିବା ଯାଏଁ ମୋର
ହସ ଅତିଥି ।
୧୧୨)
ପିଆସୀ ଓଠ
ଯେତେ ଲୁହ ପିଇଲେ
ନୁହେଁ ସନ୍ତୁଷ୍ଟ ।
୧୧୩)
ଲୁହ ଦୀପାଳି
ଜାଳିବି ପ୍ରଭୁ ପାଦେ
ନିତି ମୁଁ ଜଳି ।
~ ଗୀତା ଷଡ଼ଙ୍ଗୀ
୧୧୪)
ମଣିଷ ଜନ୍ମ
ଅଦୃଶ୍ୟ ହାତବେଡ଼ି
ଲୁହ ଓ ଲହୁ ।
୧୧୫)
ଲୁହର ବନ୍ୟା
ସୁଖ, ଦୁଃଖର ସାଥି
ଅବୋଧ୍ୟ ଗୀତି ।
୧୧୬)
ନିଃସ୍ତବ୍ଧ ରାତ୍ରୀ
ଉଜାଗର ଧରିତ୍ରୀ
ଅଶ୍ରୁ ପ୍ଳାବନ ।
୧୧୭)
ଅସହ୍ୟ ତାତି
ଅଶ୍ରୁଭିଜା ନୟନ
ବେଦନା ସିକ୍ତ ।
୧୧୮)
ଶିଶିର ସନ୍ଧ୍ୟା
ପଦ୍ମିନୀ ଆଖିଲୂହ
ଭଗ୍ନ ହୃଦୟ ।
୧୧୯)
ନିର୍ଲିପ୍ତ ହସ
ଶୁଷ୍କ ଲୋତକ ଧାରା
ଅବୋଧ୍ୟ ଭାଷା ।
୧୨୦)
ଦାରୁଣ ଦୁଃଖ
ଅଭିଶପ୍ତ ଜୀବନ
ମା' ଆଖି ଲୁହ ।
୧୨୧)
ମୋହନ ବଂଶୀ
ଇନ୍ଦ୍ରଧନୁର ରଙ୍ଗ
ବିଦାୟୀ ଅଶ୍ରୁ ।
୧୨୨)
କରୋନା ଝଡ଼
ମୃତ୍ୟୁ କରାଳ ଛାୟା
ଅଶ୍ରୁଳ ପ୍ରାଣ ।
୧୨୩)
ରାବଣ ଭୀତି
ଜାନକୀ ଆଖି ଲୁହ
ଲଙ୍କା ଦହନ ।
୧୨୪)
ପ୍ରେମିକା ଲୁହ
ପ୍ରେମିକର ଚିଟାଉ
ଭଞ୍ଜ ମଞ୍ଜୁଳ ।
୧୨୫)
ମୁକ୍ତ ଗବାକ୍ଷ
ପ୍ରେୟସୀ ଲୁହବିନ୍ଦୁ
ସ୍ନିଗ୍ଧ ରଜନୀ ।
୧୨୬)
କୋକେଇ ଉଠେ
ନିରବ ଶବାଧାର
ଲୋତକ ସିନ୍ଧୁ ।
୧୨୭)
ଶିଳ୍ପୀ ନିମଗ୍ନ
ନିହାଣ ଆଖିଲୁହ
ପାଷାଣ ହସେ ।
୧୨୮)
ବକ ଧାର୍ମିକ
କୁମ୍ଭୀରର ଲୋତକ
ଅଭେଦ୍ଯ ବ୍ୟୁହ ।
୧୨୯)
ମହାଭାରତ
ପାଞ୍ଚାଳୀଆଖି ଲୁହ
କୌରବ ଧ୍ୱଂସ ।
୧୩୦)
ନେଫା ବୋଡର
ଲୁହ, ଲହୁ କାହାଣୀ
ବୀର ସହୀଦ ।
୧୩୧)
ବିଦ୍ଧ ଧରଣୀ
ବିରାଙ୍ଗନାର ଅଶ୍ରୁ
ନାରୀ ଧର୍ଷିତା ।
୧୩୨)
ହସେ ବୈଷାଖ
ବସନ୍ତ ଆଖି ଲୁହ
ଝୁରେ ଶ୍ରାବଣ ।
~ ମନୀଷା ମିଶ୍ର
୧୩୩)
ସବୁ ଛାର୍'ଖାର୍ ନ
ତତ୍'ଲା ପାନି ଘର୍'ପୁଡ଼େ
ମାଁ'ର ଆଖି ଲହ ।
୧୩୪)
ମୁନୁଷ୍ 'ର ଜୀବନ୍
ଦଏବର୍ ହାତେ ରଶି
ଆଁଖି ଲହଧାର୍ ।
୧୩୫)
ନୂଆଁ ଭୁଆସେନ୍
ଆଖିର୍ କନେ ଲହଧାର୍
ମନ୍ ଛନ୍ ଛନ୍ ହେସି ।
୧୩୬)
ଧୂକା ଗରେଲ
ମନର୍ ବେଦନା ମନ୍ ଜାନ୍'ସି
ଆଖିର୍ ଲହ ମର୍'ସି ।
~ ମନୀଷା ମିଶ୍ର
୧୩୭)
ଲୁହର ବନ୍ୟା
ବୁକୁଫଟା ଚିତ୍କାର
ଶ୍ରାବଣ ଶେଷ ।
୧୩୮)
ଆଖିରେ ଲୁହ
ନିର୍ଣିମେଶ ନୟନ
ଫେରନ୍ତା ପଥ ।
୧୩୯)
ଆଖିର ଲୁହ
ଗାନ୍ଧାରୀ ସ୍ୱପ୍ନଭଙ୍ଗ
ଅଫେରା ପୁତ୍ର ।
୧୪୦)
ଛଳନାମୟୀ
ଲୁହର ଇନ୍ଦ୍ରଜାଲ
ବିଦ୍ଧ ପୌରୁଷ ।
୧୪୧)
ଭାବ ଆବେଶ
ଭକ୍ତିରସ ସ୍ୱାଦନ
ଅଶ୍ରୁ ପ୍ଳାବନ ।
୧୪୨)
ବୀଣା ଝଙ୍କାର
ମୀରା କୃଷ୍ଣ ବିଭୋର
ଲୁହ, ଭାବର ।
୧୪୩)
ସୀମାନ୍ତ ବୀର
ଲୁହ, ଲହୁର ଗାଥା
ବିନିଦ୍ର ରାତି ।
୧୪୪)
ପଦ୍ମର ପତ୍ର
କାଚକେନ୍ଦୁ ଜୀବନ
ଅଶ୍ରୁର ଧାରା ।
~ ରମାକାନ୍ତ ସତପଥି
☆☆☆☆☆☆☆☆
कोई टिप्पणी नहीं:
एक टिप्पणी भेजें