ସାରସ୍ୱତ "Tanka/ତାଂକା" କାବ୍ୟ ଯାତ୍ରା
୧)
ମନ ଗ୍ୟାଲେରୀ
ଅଛ ହୃଦ ଭିତରେ
ତୁମେ ରୂପସୀ
କିପରି ଭୁଲିବି ମୁଁ
ତୁମ ଅଭୁଲା ସ୍ମୃତି ।
~ ପ୍ରଦୀପ କୁମାର ଦାଶ
୨)
ରୂପସୀ କନ୍ୟା
ଓଠରେ ମଧୁ ବନ୍ୟା
ଓଦା ପଣତ
ଆଖି ମୃଦୁ ଝରଣା
ସନ୍ୟାସୀ ଧ୍ୟାନ ଭଗ୍ନା ।
୩)
ମନ ମୋ ସିକ୍ତ
ତୁମର ବିଚ୍ଛେଦରେ
ହୃଦୟ ରିକ୍ତ
ନିତି ଜୀଇଁ କି ମରେ
ପ୍ରୀତି ମୋ ଗାଢ଼ ରକ୍ତ ।
~ ରାଜେଶ କୁମାର ମୁଣ୍ଡ
୪)
ମନ ମଇନା
ନୀଳ ଆକାଶ ପରେ
ଡେଣା ହଲାଇ
ପ୍ରିୟା କୁ କହିବୁରେ
ରହିଛି ମୁଁ ଅନାଇ !
~ ଆଶୁତୋଷ ମେହେର
୫)
ତୋ ଭିତରେ ମୁଁ
ରହିଛି ରହିଥିବି
ସବୁ ଜନ୍ମରେ
ଜହ୍ନ ତାରା ମେଳରେ
କରିବା ଘରଟେରେ ।
~ ପ୍ରତିମା ମେହେର
୬)
ସ୍ନିଗ୍ଧ ଜୋଛନା
ମହାନଦୀର ବକ୍ଷେ
ଅଭୂଲା ସ୍ମୃତି
ତନ୍ଦ୍ରାହୀନ ନୟନ
କାହିଁ ସେ ସିହରଣ ।
୭)
ତମସା ତୀରେ
ନାହିଁତ କୁଜ୍ଝଟିକା
ଲୁପ୍ତ ସେ ଧାରା
ନିସ୍ତବ୍ଧ ନିକାଞ୍ଚନ
ଅଫେରା ଇତିହାସ ।
୮)
ଉନ୍ନତ ନାଶା
କୁଞ୍ଚିତ କେଶରାଶି
ମୃଗ ନୟନୀ
କାହିଁ ସେ ପ୍ରିୟତମା
ଅଭିମାନେ ମଉନ ।
~ ରମାକାନ୍ତ ସତପଥି
୯)
ମହୁଆ ବାସ୍ନା
ରାତ୍ରୀର ନିର୍ଜନତା
ସୁନେଲି ସ୍ୱପ୍ନେ
ହଜିଯାଏ ହୃଦୟ
ପୁଳକିତ ଶରୀର ।
୧୦)
ଜହ୍ନ ହସୁଛି
ଛନ୍ଦାୟିତ ଶରୀର
ମହୁଆ ବାସ୍ନା
ଅତୀତ ପୃଷ୍ଠାତଳେ
ଆତ୍ମ ବିଭୋର ମନ ।
୧୧)
ନିର୍ଜନ ରାତ୍ରୀ
ଉନ୍ମୁକ୍ତ ବାତାୟନ
ଦୃଷ୍ଟି ନିବଦ୍ଧ
ସୁଦୂର ଦିଗ୍'ବଳୟ
ଅକୁହା ମନ ବ୍ୟଥା ।
~ ମନୀଷା ମିଶ୍ର
୧୨)
ଆରେ ଫଗୁଣ
ମନ କୁ କଲୁ ଚୋରି
କଲୁ କୁହୁକ
ମଳୟ କହେ କାନେ
ଚୁପି ଚୁପିକି ଆସି ।
~ ରତ୍ନ ପ୍ରଭା ସିଂ
୧୩)
ମନ ଚଢେଇ
ଉଡିଗଲୁ କାହିଁକି
ଭାବ ଲଗେଇ,
କେମିତି ରହିବି ମୁଁ'
ତୋ'ଠୁ ଅଲଗା ହୋଇ ।
୧୪)
ସେଦିନ ପ୍ରିୟା
ଆକାଶରେ ନ,ଥିଲା
ତାରା କି'ଜହ୍ନ,
ଖାଲି ତୁମେ ଆଉ ମୁଁ'
ମୋ ଗାଢ ଆଲିଙ୍ଗନ।
~ ସମିତା ସ୍ବାଇଁ
୧୫)
ଝଡି ବରଷା
ନଈ ଲଂଘିଲା କୂଳ
ଯିବାକୁ ହେବ
ରାତି ଟା ଘନେଇଲା
ବିପଦ ଆସିଲା ମାଡ଼ି ।
୧୬)
ଅତୀତ ସ୍ମୃତି
ଭୁଲିଛି କିଏ କେବେ
ଜୀବନ ଗୀତି
ଉଜ୍ଜୀବିତ ହୋଇଲେ
ଦେହ ଯାଏ ଶିହରି ।
~ ଡମ୍ବରୁଧର ବାଗ
୧୭)
ଶୂନ୍ୟ ପୁରୁଷ
ନିର୍ଗୁଣ ନିରାକାର
ରୂପ କଳ୍ପନା
ହୃଦୟେ ସମର୍ପଣ
ଦିଏ ଭକ୍ତି କୁସୁମ ।
୧୮)
ବରଷା କାଳ
ବିରହ ବେଦନା ରେ
ଅସ୍ଥିର ମନ
ପାଶେ ମୋ ନାହିଁ ପ୍ରିୟା
ଝରେ ପ୍ରେମ ର ଫଲ୍ଗୁ ।
~ ବାସନ୍ତୀ ଦେଈ
୧୯)
ଚାନ୍ଦିନୀ ରାତି
ମିଟି ମିଟି ତାରକା
ପ୍ରିୟା ଲୋ ମୋର
ଭିଜିବା ତନ୍ଦ୍ରାଲୋକେ
ମଧୁଝରା ଲଗନେ ।
୨୦)
ପ୍ରେମଟା ସିନା
ଅଢେଇ ଅକ୍ଷର ସେ
ମିଠା ବାସ୍ନାରେ
ଝରା ଫଗୁଣ ମହକେ
ଭରେସେ ପ୍ରୀତି ଫଲ୍ଗୁ ।
୨୧)
ମେଘ ସବାରୀ
ଆସିଛି ଶ୍ରାବଣୀ ତ
ରାଗ ମହ୍ଲାରେ
ଝିପି ଝିପି ବର୍ଷା ରେ
ଆମ ଗାଆଁ କୁ ପରା ।
୨୨)
ରଜନୀଗନ୍ଧା
ଫୁଲର ରାଣୀ ତୁଲୋ
ମହକ ଭରା
ଉନ୍ମୁକ୍ତ କବରୀ ରେ
ସଜାଏ ପ୍ରିୟା ମୋର ।
୨୩)
କିଏ ମାଖିଲା
ତୋ ଦେହେ ସପ୍ତରଙ୍ଗ
ଇନ୍ଦ୍ରଧନୁ ତୁ
କାହା ତୂଳୀ ସ୍ପର୍ଶରେ
ଜୀବନ୍ତ ଦିଶୁ ତୁହି ।
୨୪)
ନୀଳ ତରଙ୍ଗ
ଘନ ଜଳ ରାଶିରେ
ବୋଇତ ମେଲି
ସାତ ଦରିଆ ପାରେ
ସାଧବ ପୁଅ ଯାଏ ।
୨୫)
ସାଧବ ବୋହୁ
ନାଲି ଟୁକୁ ଟୁକୁ ତୁ
ଶ୍ୟାମଳ ଘାସେ
ଝଡି ବର୍ଷାର ସାଥେ
ଓଢଣୀ ଟାଣି ମୁଣ୍ଡେ ।
୨୬)
ଭରା କଦମ୍ବ
ବାସ୍ନାୟିତ ଧରଣୀ
ପ୍ରାଣ ଓ ମନ
ପୁଲକିତ ହୁଏରେ
ଆଦ୍ୟ ଆଷାଢ ବର୍ଷା ।
୨୭)
ଗାଆଁରେ ମୋର
ସକାଳ ସୂର୍ଯ୍ୟ ଉଏଁ
କିରଣ ବୁଣି
ଅଳସ ଡେଣାକୁ ଝାଡି
ପକ୍ଷୀ ଯାଆନ୍ତି ଉଡି ।
୨୮)
ଜନ୍ମଭୂମି ମୋ
ସ୍ଵର୍ଣ୍ଣମୟୀ ମାଆଟି
ସକଳ ପ୍ରାଣେ
ଶାନ୍ତି ମୈତ୍ରୀ ବାରତା
ନିଇତି ଏଠି ବୁଣେ ।
୨୯)
ଦୂର ଦିଗନ୍ତ
ସମୁଦ୍ର ଓ ଆକାଶ
ଏକାକାର ସେ
ଘନ କୁଜ୍ଝଟୀକା ରେ
ନିସ୍ତବ୍ଧ ଇଲାକା ସେ ।
୩୦)
ନୀଳ ଶଇଳେ
ନୀଳ ସିନ୍ଧୁ ର ତୀରେ
ନୀଳ ଗଗନେ
ନୀଳ ଚକ୍ର ବାନା ତୋ
ଉଡଇ ଫରଫର ।
୩୧)
ଅତୀତ ସ୍ମୃତି
ବାରବାଟୀ ଦୁର୍ଗ ସେ
ଚାରୁ ଉତ୍କଳେ
ଗର୍ବ ଗୌରବ ଆଣି
ମୁକସାକ୍ଷୀ ଅଟଇ ।
୩୨)
ପ୍ରିୟା ଲୋ ମୋର
ଜହ୍ନରେ ତୋଳିବି ତ
ଏକ ନଅର
ସାଜିବୁ ରାଣୀ ତୁଲୋ
ମୁଁ ସାଜିବି ତୋ ରାଜା ।
୩୩)
ଆଦ୍ୟ ଆଷାଢେ
ଭିଜା ମାଟିର ବାସ୍ନା
ପ୍ରାଣ ମନରେ
ଆକୁଳ ଭରା ତୃଷ୍ଣା
ଜୀବ ଜଗତ ପ୍ରାୟେ ।
~ ଦମୟନ୍ତୀ ରଥ
୩୪)
ମୋ ପ୍ରାଣପ୍ରୀୟା
ହସ ତା ମନଲୋଭା
ହୃଦୟ ଛୁଆଁ
ମନ ମୋ ଝୁରିମରେ
ସେଇ ହସରେ କିଆଁ ।
୩୫)
ମୋ ମାଟି ମାଆ
ତାହାରି ସାନ୍ନିଧ୍ୟରେ
ବଢଇ ଆହା
ଧନ୍ୟ ମୋର ଜୀବନ
ମୋ ପ୍ରାଣ ତା'ର ଦାନ ।
~ ସୁଧୀର କୁମାର ପଣ୍ଡା
୩୬)
ତୁମ ଆଖିରେ
ଖୋଜିଛି କେତେ ଅର୍ଥ
ପାଇନି କେବେ
ଏବେ ଅର୍ଥ ପାଇଛି
ଯା' ଅନର୍ଥର ମୂଳ ।
୩୭)
ମଝି ଆକାଶେ
ଉଡାଣଖୋର ପକ୍ଷୀ
ସେ କେଉଁ ଜାଣେ
ମାଟି ନା ଆକାଶର
ଉଡିବା ଯେ ତା ଧର୍ମ ।
~ ଲିଙ୍ଗରାଜ ପାତ୍ର
୩୮)
ନିରବୀ ଯାଏ
କେତେ ଆପଣା ସ୍ୱର
ମୃତ୍ୟୁର ଭୟ
ବିସ୍ତାରେ ତାର କାୟା
ଆସଇ ଯେବେ ଜ୍ୱର ।
~ ରଞ୍ଜନ ଜେନା
୩୯)
କାଳିଆ ସୁନା
ଆସୁଛି ରଥଯାତ୍ରା
ବୁଣିବି ପାଟ
ଗୁନ୍ଥିଵି ଟାହିଆ ଟେ
ଦେଇ ଭକ୍ତି ସୁମନ ।
୪୦)
ଭାବ ଭକ୍ତି ରେ
ଦର୍ଶନ ଦେବୁ ମୋତେ
କଳା କାଞ୍ଚନ
ଲାଗେନା ମୋତେ ଭଲ
ବିନା ତୋ ଦରଶନ ।
୪୧)
ପରଜାପତି
ଫୁଲ ରୁ ଫୁଲ ଉଡେ
ତରକା ଅତି
ଦେଇ ଓଠେ ଚୁମ୍ବନ
କରଇ ମଧୁ ପାନ ।
~ ବାସନ୍ତୀ ଦେଈ
୪୨)
ଜଗତନାଥ
ପଦ୍ମପାଦେ ତୁମ୍ଭର
ଆନନ ନତ
କୃପା କଟାକ୍ଷ ତୁମ
ରହିଥାଉ ଅନନ୍ତ ।
୪୩)
ପ୍ରକୃତି ରାଣୀ
ରୂପେ ମୋହିତ ମୁଁ ଯେ
କରିଛ ଗୁଣି
ହଜିଯାଏ ତୁମଠି
ପାରେନାହିଁ ମୁଁ ଜାଣି ।
୪୪)
ପ୍ରୀତିର ରସ
ମଧୁଠୁ ମଧୁର ଯା'
ସତେ ପୀୟୁଷ
ଜୀବ ଗଣ ସର୍ବେ ଯା'
ପାଖେ ହୁଅନ୍ତି ବଶ ।
୪୫)
ପ୍ରିୟ ଗୋ ପ୍ରିୟ
ତୁମ ପ୍ରୀତି ପରଶ
ଟିକିଏ ଦିଅ
ଏଇ ମଧୁ ଲଗନେ
ଛାଡି ଜମା ନ ଯାଅ ।
୪୬)
ଜୋଛନାରାଣୀ
କେତେ ପରଶୁଛ ଗୋ
ପୀରତି ପାଣି
ରାତ୍ରୀରେ ରଚ ରାସ
ସତେ ଭାରି ସିହାଣୀ ।
୪୭)
ଉଷା ଗୋ ଉଷା
ତୁମ ଆଗମନରେ
ବିଗତ ନିଶା
କର୍ମ ପ୍ରେରଣାର
ଜାଗେ ନବପ୍ରତ୍ୟାଶା ।
~ ଚିନ୍ମୟୀ ସାହୁ
୪୮)
ଆସିଛି ବର୍ଷା
ଖେତକୁ ଯାଏ ଚଷା
ଲଙ୍ଗଳ ସଜା
ବେଙ୍ଗ ବେଙ୍ଗୁଲି ବାହା
ଆକାଶେ ବାଜେ ବାଜା ।
୪୯)
ଜୀବନ ଦୀପ
ଦପ ଦପ କରୁଛି
କେଜାଣି କେବେ
ତାହା ଯିବଟି ଲିଭି
ପ୍ରଭୁ ଶରଣେ ଯିବି ।
~ ଜୟରାମ ସାହୁ
☆☆☆☆☆☆☆☆☆☆
कोई टिप्पणी नहीं:
एक टिप्पणी भेजें