ODIA SEDOKA POEM'S ~ 10

ସାରସ୍ୱତ SEDOKA/ସେଦୋକା କାବ୍ୟ ଯାତ୍ରା ~ ୧୦

୧)

ଶେଷ ଆଷାଢ଼ 

ଶୁଖି ଯାଇଛି କୂପ

ମେଘ ହେଲା ନିଷ୍ଠୁର 

ଦୁଃଖିତ ନଈ

ଜଳ ଧାରା ଶୁଖେଇ

ଭାଙ୍ଗି ଦିଏ ହୃଦୟ ।

~ ପ୍ରଦୀପ କୁମାର ଦାଶ

୨)

ପ୍ରଶସ୍ତ ପାପ

ଅହେତୁକ ଯନ୍ତ୍ରଣା

ଅନ୍ୟାୟର ମନ୍ଦିର,

ନିତି ଦିନିଆ

ଜଣାଶୁଣା ଘଟଣା

କିଏ ନୁହେଁ କାହାର ।

୩)

ଆତ୍ମୀୟତାର

ଛୁରୀ ଖୁମ୍ପନି ଆଉ 

ଅସମ୍ଭାଳ ହେଲାଣି,

ସହିଷ୍ଣୁତାର

ବୋଝ କେତେ ବୋହିବି 

ହେଲା ଆଣ୍ଠୁଏ ପାଣି ।

~ ରାଜେଶ କୁମାର ମୁଣ୍ଡ

୪)

ଜୀବନ ଝଞ୍ଜା

ଘାତ ପ୍ରତିଘାତର

ନିର୍ବାପିତ ସଳିତା

ହସ ଓ କାନ୍ଦ

ମାଟି ଘଟ ପଞ୍ଜୁରୀ

ପ୍ରାଣପକ୍ଷୀ ଆବଦ୍ଧ ।

୫)

କର୍ମର ପଥ

ଅସରନ୍ତି କର୍ତ୍ତବ୍ୟ

ଶିଥିଳ ହସ୍ତ ପଦ

ଜୀବନ ସନ୍ଧ୍ୟା

ପରିଣତ ବୟସ

ଦୃଢନିଷ୍ଠ ସାଧନା ।

୬)

ପରିଶ୍ରମରେ

ଦରିଦ୍ରତା ରହେନି

ଧର୍ମରେ ଲିଭେ ପାପ

ମୌନ ଧର୍ମରେ

ରହେ ନାହିଁ କଳହ

ଜାଗ୍ରତ ପାଇଁ ଭୟ ।

~ ମନୀଷା ମିଶ୍ର

୭)

ଦୃଷ୍ଟି ନିବଦ୍ଧ

ସୁଦୂର ଦିଗବଳୟ

ଭାବନା ବାଟବଣା

ଦୀର୍ଘ ନିଶ୍ୱାସ

ଭିଜା ଭିଜା ନୟନ

କୋହଭରା ଉଚ୍ଚ୍ୱାସ ।

୮)

ଅନନ୍ତ ବ୍ୟଥା

ସୃଷ୍ଟି, ସ୍ଥିତି, ବିଲୟ

ବନ୍ଧୁର ଚଲାପଥ

ଭୀଷ୍ମ ପ୍ରତିଜ୍ଞା

କଣ୍ଟକିତ ଫଗୁଣ

ତନ୍ଦ୍ରlହୀନ ରଜନୀ ।

୯)

ମୁଁ ସେହି ବ୍ୟକ୍ତି

ସମ୍ପର୍କ ଟା ଯେ ସ୍ଥିର

ଲମ୍ବିଚ୍ଛି ସେହି ରାସ୍ତା

ବଦଳିଚ୍ଛି ଯେ

ସମୟ, ଦୃଷ୍ଟିକୋଣ

ଅନୁଭବର ଭାଷା ।

~ ରମାକାନ୍ତ ସତପଥି

୧୦)

ନୀଳ ନୟନ !

ମେଘାଚ୍ଛନ୍ନ ଆକାଶ

ଦିଅ ପ୍ରଭୂ ଶରଣ

ବିଦାୟୀ ବେଳା !

ଢ଼ାଳିଦିଅ ଆଶିଷ 

ଦୁଃଖ କର ହରଣ ।

୧୧)

ନିଃଶବ୍ଦ ଭାବ !

ପଦ ତଳେ ପ୍ରଣତୀ

ଦେଇଯାଅ ବରଷା

ଧରା ପ୍ଳାବିତ

ପ୍ରତୀକ୍ଷା'ର ମୁହୂର୍ତ୍ତ 

ଆଗମନେ ଶ୍ରାବଣୀ ।

~ ପ୍ରତିମା ମେହେର

୧୨)

ସ୍ୱାର୍ଥ ପରସ୍ତ

ଜଗତରେ ସଭିଏଁ

କାହିଁକି ହନ୍ତସନ୍ତ

ପରୋପକାରେ

ଲାଗିଥା ରେ ସର୍ବଦା

କାହିଁକି ତୁ ବ୍ୟଥିତ ।

~ ଶ୍ରୀରାମ ସାହୁ

୧୩)

ଈଶ୍ବର ସତ୍ତା 

ସାକାର ସେ ରୂପରେ 

ନିରାକାର ନାମରେ 

ପରମେଶ୍ବର

ସର୍ବ ବ୍ଯାପକ ଆତ୍ମା 

"ଓଁ"କାର ମୂଳମନ୍ତ୍ର ।

୧୪)

ଏ ଜୀବନର 

ସମସ୍ତ ଜୟଯାତ୍ରା 

ଯନ୍ତ୍ରଣା ର ସଂଗ୍ରାମ 

ପ୍ରତି ମନର 

ଧର୍ମୀୟ ଭାବ ଭକ୍ତି 

ସବୁ ଅଦୃଶ୍ୟ ଶକ୍ତି ।

୧୫)

ପାପ ଓ ପୁଣ୍ୟ 

ଆସକ୍ତି ଯୁକ୍ତ ହୋଇ 

ଜନ୍ମ ମୃତ୍ୟୁ କାରଣ

ମାୟାରେ ବାୟା 

ସବୁ ଜାଣି ମଣିଷ 

କର୍ମାନୁଯାୟୀ ଫଳ ।

୧୬)

ପ୍ରେମ ପ୍ରଣୟ 

ବସନ୍ତ ରେ ମଳୟ 

ଛୁଇଁଯାଏ ହୃଦୟ 

ପୁଲକ ଭରେ 

ଗାଏସେ' ପ୍ରୀତି ଗୀତି 

ନଥାଏ ଭୟ ଭ୍ରାନ୍ତି ।

୧୭)

ବାହୁଡା ଯାତ୍ରା 

ଆମ ପରମ୍ପରାରେ

ଜଗନ୍ନାଥ ସଂସ୍କୃତି 

ଚେତନା ସାର 

ଦିବ୍ୟ ଭାବ ସାନିଧ୍ଯ 

ସାରା ଜଗତ ଖ୍ଯାତ ।

~ ସମିତା ସ୍ବାଇଁ

୧୮)

ଚକାନୟନ

ଫେରୁଛ ଶ୍ରୀମନ୍ଦିର

ଭାଇଭଉଣୀ ସାଥେ

ଭାରିଜା କୋପେ

ଦ୍ବାର ଫିଟେଇବେନି

ହୋଇବ ହଟହଟା ।

୧୯)

ମନ ମୋହନ

ଶ୍ରୀୟା ମାନ ଭଞ୍ଜନ

ଦେବଟି ରସଗୋଲା

ମାନବ ଲୀଳା

ସଂସାରେ ପତିପତ୍ନୀ

ତୁମେ ଉଦାହରଣ ।

~ ବାସନ୍ତୀ ଦେଈ 

୨୦)

ମୁକ୍ତ ଗଗନେ

ପ୍ରଜାପତିଟିଏ ସେ

ଉଡେ ହୋଇ ବିଭୋର

ଫୁଲ ଉପରେ

ଉଡ଼ଇ ଫର ଫର

ଡେଣା ଝାଡି ଉତଫୁଲ୍ଲ  ।

୨୧)

ଜୀବନ ଗୋଟେ

ଭାରି ସୁଦୀର୍ଘ ପଥ

ଚାଲିବା ହେବ ମତେ

ଅନେକ ଦୂର

ସଂସାରର ଜଂଜାଳ

ସହିବା ଅନିବାର୍ଯ୍ୟ ।

୨୨)

ପଥିକଟିଏ

ବାଟ ର ବାଟୋଇ ସେ

ନାହିଁ ଘର ଠିକଣା

ଯାଯାବର ସେ

ନାହିଁ ସଖା, ସହୋଦର

ନାହିଁ ଜୀବନ ଲକ୍ଷ୍ୟ

~ ଜିଗୀଷା ମିଶ୍ର

☆☆☆☆☆☆☆☆☆☆